Zeughi de carte da tradiçion ligure

Ne dixe i studioxi che e carte en arrivæ inta penisoa italiaña da-o Levante do secolo XIV, pe mezo di trafeghi pe mâ, e che de chì se son spantegæ pe tutte e çiviltæ ponentiñe, fin a-e Americhe. Demoa antiga e nòbile, delongo apprexâ da tutte e classe soçiale, un solo masso de carte o ve permettià d’inandiâ de miggiæa de zeughi despægi, tutti co-a seu stöia e con unna seu mainea de mette a-a preuva e vòstre capaçitæ intellettuale e de conçentraçion.

Inte sto scito emmo vosciuo arrecheugge e regole de un numero de zeughi de carte liguri, compreiso dötrei che ean à reisego de scentâ do tutto.

Famiggia di taròcchi

Tegnuo da ben ben de zugoei pe-o zeugo de carte o ciù nòbile e strategico, da-a seu invençion do secolo XV inte l’Italia do settentrion o zeugo di taròcchi o l’à viægiou pe tutta l’Euröpa, e o l’é arrivou fiña a-o Texas e a-a Groenlandia.

Pe di secoli, i taròcchi en stæti un di zeughi i ciù pratticæ in Liguria. Pe desgraçia, a-a giornâ d’ancheu i zugoei de sto antigo zeugo s’incontran delongo ciù de ræo. Squæxi scentæ sensa lasciâ de traccia, e regole di taròcchi liguri en stæte documentæ e sarvæ graçie a-o travaggio de di appascionæ che an arrecuggeito e testimonianse di pöchi zugoei arrestæ.

Taròcchi à pessigo

2

Belliscimo zeugo de taròcchi ligure assæ particolâ, pin de vivessa e con unna profonditæ strategica ch’a s’attreuva de ræo inti zeughi pe doî. Impæntou co-o treisette.

Gatti

2-4

Verscion originäia do zeugo de taròcchi ligure. Se ghe zeuga inta quattro (à cobbie), inta trei ò inta doî (tutti da pe lê). Impæntou co-o zeugo de taròcchi de l’Italia do settentrion dito Mitigati, ma con de particolaritæ che ghe dan ciù tanta profonditæ strategica.

Famiggia da sgobba

A sgobba o l’é un di zeughi italien ciù conosciui. Stæta inventâ fòscia à Napoli do secolo XVIII, a s’é spantegâ insemme a-e seu variante pe tutta l’Italia e à l’estranxeo ascì. I zeughi descriti chì de sotta en e variante tradiçionale pratticæ in Liguria, inte regioin vexiñe, e da-e comunitæ ligure à l’estranxeo.

Cirolla

2-4

Demoa ligure par excellence, a cirolla a l’entuxasma grendi e piccin. Inte sto zeugo façile da imprende, i capriçi da Fortuña ammerman e differense tra esperti e prinçipianti. O no l’é un zeugo che se ghe zeuga in scilençio: à cirolla se ciarla, se ciætezza, se rie, se se rattella.

Cirollon

4

Fræ grande da cirolla, pe zugâ a-o cirollon gh’é beseugno de un pittin ciù de conçentraçion e serietæ. Comme recompensa, attroviæ un zeugo ch’o ve daià a poscibilitæ de progettâ de strategie ciù complesse, ma co-o mæximo axillo da cirolla.

Famiggia da biscambiggia

A biscambiggia, insemme a-e tante seu variante e a-a briscola, a vëgne da unna famiggia de zeughi franseixi estinti ch’a l’aiva tra i seu membri a brisque, a brusquembille e o briscan. Arrivæ inta penisoa italiaña, sti zeughi an dæto origine à ben ben de variante. Chì de sotta descrivemmo e variante primmäie ligure.

Biscambiggia

2, 3, 4, 6

Coxo ligure da briscola, a-a quæ o l’assomeggia ben ben. Zeugo assæ sencio, a-o ponto ch’o se porrieiva definî banale. A veitæ a l’é che a biscambiggia – dæto ch’a no domanda tròppa conçentraçion – o l’é o zeugo perfetto pe-i zugoei che veuan ciarlâ e demoâse sensa stâ à açervellâse.

Mariagio

2

Verscion ciù compricâ e strategica da biscambiggia inta doî. Spantegâ pe tutta a Liguria, ma a-a giornâ d’ancheu a l’é zugâ ciù che tutto into levante.

Biscambiggia ciammâ

5

Bella variante da biscambiggia assæ ciù strategica, pe çinque zugoei in doe squaddre. A-o comenso, a compoxiçion preçisa de squaddre a no l’é conosciua da-i zugoei. Chi o saià o traitô?

Atri zeughi

I zeughi in deuvia in Liguria (ancheu ò in antigo) no finiscian con quelli de sta lista. Tra i ciù importanti no ancon descriti inte sto scito voemmo arregordâ:

• A belòtta, spantegâ pe tutto o levante ligure. A l’é arrivâ in Liguria da-a Fransa, donde o l’é o zeugo naçionale (o nomme originale franseise o l’é belote). A dita Dal Negro a fa un masso zeneise da 32 carte apòsta pe sto zeugo.
• O picchetto, un atro zeugo franseise (piquet).
• O gòffo, un zeugo d’azzardo fòscia d’invençion zeneise. Coscì comme a primmea, o se peu consciderâ un messiavo do poker.
• O treisette, zeugo spantegou pe tutta a penisoa italiaña, co-e seu tante variante comme o ciammatrei.