Gatti
zeugo de taròcchi ligure pe 2-4 zugoei
Graçie à Romano Romani de Zena e à M.T. de Saña pe avei scompartio e regole do zeugo. Graçie ascì a-i atri zugoei che n’an mandou de testimonianse de variante addeuviæ da-e seu bande.
Noçioin de base
A verscion clascica do zeugo a l’é pe quattro zugoei in cobbia. In azzonta, inta seçion dabasso saià descrito a variante pe trei zugoei.
Dispoxiçion
I quattro zugoei s’assettan in croxe. I zugoei de fronte en in cobbia, e zeugan inta mæxima squaddra.
Masso
Pe zugâ s’addeuvia un masso de taròcchi da 78 carte, fæto de 14 carte de mersa divise inte 4 merse (coppe ♥, dinæ ♦, scioî ò bastoin ♣ e spoæ ♠), 21 taròcchi numeræ da l’1 a-o 21, e o matto (ch’o l’à o numero 0 inte çerti massi). E carte de mersa en, pe ordine crescente, 1 (ò asso), 2, …, 9, 10, sbiro (S), cavallo (C), dònna (D), òmmo (Ò).[1] I taròcchi guägnan in sce tutte e atre carte, e tra doî taròcchi o guägna quello co-o numero ciù erto. O matto o l’é unna carta speçiale, e o seu ròllo o saià descrito inta seu seçion.
Moen
O zeugo o l’é fæto de un numero de moen, che en e fase de zeugo tra unna distribuçion e l’atra. Unna partia a l’é fæta de quattro moen.
Distribuçion
Pe-a primma man, o massê o l’é çernuo à caxo. Pe quelle apreuvo, o ròllo do massê o va a-i atri zugoei into senso conträio de ragge do releuio. O massê o remescia e carte e o ê pòrze à l’avversäio in sciâ seu manciña pe coppâle. Dapeu o massê o dà 19 carte pe zugou, à partî da quello in sciâ seu drita, in gruppi de çinque carte pe træ vòtte e un de quattro l’urtima. À l’urtimo gio de distribuçion, a-o massê gh’arrestià doe carte de ciù, ch’o se piggia pe lê.
Scarto
Stæte dæte tutte e carte o massê, ch’o se n’à piggiou de ciù, o ne scarta doe pe arrivâ a-o mæximo numero de carte di atri zugoei. O massê o ê mette coverte da-a parte sensa fâle vedde a-i atri zugoei. Ste carte en dite o scarto.
No se peu mette into scarto ni i òmmi, ni o taròcco numero 1 (o bagatto).
Execuçion
Preise
E moen do zeugo en fæte de unna serie de preise. Unna preisa a l’é a fase de zeugo inta quæ ciaschedun zugou o calla unna carta. Inte ògni preisa, o zugou ch’o zeuga pe-o primmo, dito zugou in attacco, o calla una carta (con mettila descoverta into mezo da töa). I atri zugoei, un dòppo l’atro into senso conträio a-e ragge do releuio, replican con callâne ciaschedun unn’atra. O guägna a preisa – e o cattua e quattro carte in sciâ töa – o zugou ch’o l’à callou a carta a ciù fòrte.
Attaccâ
O zugou in attacco o peu callâ unna carta chesesegge de quelle ch’o l’à inte moen.
A-o prinçipio de unna man, o comensa in attacco o zugou in sciâ drita do massê. Dapeu, o zugou ch’o l’à guägno a preisa o calla pe-o primmo inta preisa apreuvo, e o zeugo o va avanti à sta mainea fin à quande l’é finio tutte e carte.
Replicâ
I zugoei che replican a-a carta callâ in attacco an da fâlo segondo e regole chì dabasso.
- Se l’é stæto callou unna carta de mersa in attacco, e o zugou ch’o l’à da replicâ o l’à de carte de quella mersa, aloa o l’à da callâne uña chesesegge; s’o no l’à de carte de sta mersa, aloa o l’à da callâ un taròcco. S’o no l’à di taròcchi, o peu callâ unna carta chesesegge.
- Se l’é stæto callou un taròcco in attacco, e o zugou ch’o l’à da replicâ o l’à di taròcchi, aloa o l’à da callâne un; s’o no l’à di taròcchi, o peu callâ unna carta chesesegge.
-
In azzonta:
- Quande un zugou o veu calla un taròcco, e l’é za stæto callou un ò ciù tanti taròcchi pe quella preisa, aloa o l’à da callâne un ciù erto de quelli che en za in sciâ töa, se poscibile. O peu callâ un taròcco ciù basso solo che s’o no n’à de ciù erti.
- A sola ecceçion, ch’a permette de no dâ a mente à ste regole chì de d’ato, o l’é o matto. A saià descrita inte unna seçion dabasso.
Fâ preisa
O fa preisa, ò sæ o cattua e quattro carte in sciâ töa, o zugou ch’o l’à callou o taròcco ciù erto. Se no l’é stæto callou de taròcchi, o fa preisa o zugou ch’o l’à callou a carta ciù erta da mersa d’attacco. O zugou ch’o fa preisa o cattua e quattro carte in sciâ töa e o ê poñe coverte into seu muggetto de preise da arente à lê. Pe-o sòlito, ciascheduña cobbia a l’à un solo muggetto de preise, in commun pe-i doî zugoei da squaddra.
Ponti de masso
A-a fin da man, ciascheduña de squaddre o guägna un ponto pe ògni træ carte stæte cattuæ inte preise. Se o numero de carte cattuæ da unna squaddra o no l’é divixibile pe trei, un resto de doe carte o s’à da arriondâ de d’ato, e un resto de unna carta o s’à d’arriondâ dabasso.
In azzonta, e carte da töa dabasso, se en stæte cattuæ, van ciascheduña o numero de ponti mostræ.[2]
Carte | Ponti |
---|---|
taròcchi 1 e 20[3] | 4 |
o matto | 4 |
òmmi | 4 |
dònne | 3 |
cavalli | 2 |
sbiri | 1 |
atre carte | 0 |
A somma di ponti de masso ottegnui da-e doe squaddre a l’é donca delongo 78 pe man.
O matto
O matto o l’é unna carta speçiale ch’a se peu callâ in replica à chesesegge carta. O matto o peu ëse callou ascì comme carta d’attacco, into quæ caxo o zugou ch’o calla apreuvo o l’é libero de replicâ con chesesegge carta, e a saià sta carta chì à ëse consciderâ a carta d’attacco.
Chi o zeuga o matto o perde delongo a preisa. Sciben, o no perde o matto: dòppo ch’o l’à callou, o s’ô repiggia e o ô mette into muggetto de preise da seu squaddra, pe traverso e descoverto. Dæto che a squaddra do zugou ch’o l’à callou o matto a l’arresta con unna carta de ciù (perché o zugou l’à «sarvou» o matto da unna preisa ch’o l’à perso), sta squaddra a l’avià da dâ a-i avversäi unn’atra carta in scangio: saieiva à dî, a l’avià da guägnâ unna ò ciù preise apreuvo à quella donde l’é stæto callou o matto, e a l’avià da dâ unna de carte chesesegge de quelle cattuæ inte ste preise a-i l’avversäi. Stæto fæto o scangio, per arregordâse d’aveilo fæto, a carta do matto a l’à da ëse giâ torna comme e atre into muggetto de preise.
Se a squaddra do zugou ch’o l’a callou o matto a no l’arriësce à dâ unna carta in scangio (saieiva à dî ch’a no l’arriësce à guägnâ a-o manco unn’atra preisa dòppo che l’é stæto callou), a-a fin da man a l’avià da dâ via o matto a-i l’avversäi.[4]
Bagatto urtimo
Se un zugou o calla o taròcco numero 1 (dito bagatto) inte l’urtima preisa, e o guägna a preisa, aloa a seu squaddra a guägna 20 ponti in azzonta. Se a preisa a l’é guägnâ da un atro zugou, compreiso o compagno de squaddra, aloa a seu squaddra a perde 20 ponti. Sto bonus chì o l’é dito bagatto urtimo.[5]
Boñe
Boñe de man
A-o comenso da man, tòsto finio o scarto, i zugoei, à partî da quello in sciâ drita do massê e dapeu into senso conträio a-e ragge do releuio, peuan guägnâ di ponti con annonçiâ (accusâ) che an inte seu moen de combinaçioin speçiale de carte, dite boñe. E combinaçioin poscibile en:[6]
Boña | Ponti |
---|---|
frilli (15 frilli ò ciù tanti) | 1 pe frillo |
taròcchi (10 taròcchi ò ciù tanti) | 1 pe taròcco |
gatti (matto ciù taròcchi 1 e 20) | 10 |
famiggia (e 4 figue de unna mersa) | 10 |
quaterno (de S, C, D ò Ò) | 10 |
terno (de S, C, D ò Ò) | 5 |
No gh’é mai obrigaçion d’accusâ unna boña. Se un zugou o no l’accusa, o no guägna i ponti correspondenti. Se però o veu guägnâ i ponti de unna boña, o l’à da accusâla e mostrâne e carte.
E boñe s’an da accusâ tòsto finio o scarto, avanti che o primmo zugou o calle unna carta. Se un zugou o no l’annonçia unna boña inte sto momendo, o perde a poscibilitæ de fâlo.
Un zugou o peu accusâ ciù de unna boña, compreiso ciù de unna famiggia de merse despæge, ò ciù de un quaterno ò de un terno de carte despæge. L’é permisso d’addeuviâ e mæxime carte pe ciù de unna boña: pe fâ un exempio, un zugou con 10 ò ciù tanti taròcchi, comprexi l’1 e o 20, e co-o matto ascì, o peu accusâ segge taròcchi segge gatti.
Pe-a boña di taròcchi beseugna accusâ a-o manco 10 taròcchi, e a vâ 1 ponto pe taròcco mostrou. Un zugou con ciù de 10 taròcchi o peu dispoñe de tegnîne quarchedun segretto, into quæ caxo o guägna solo che i ponti correspondenti a-i taròcchi stæti mostræ. Sciâ nottan che pe sta boña o matto o no l’é consciderou un taròcco, e donca no se peu contâlo comme un di 10 taròcchi.
I frilli en e carte numeriche de mersa, donca quelle 40 carte che no en ni de figue, ni de taròcchi, ni o matto. De mainea analoga a-a boña di taròcchi, pe-a boña di frilli se guägna 1 ponto pe frillo, à condiçion che se n’annonçe a-o manco 15. Chì ascì, se peu deçidde te tegnîne quarchedun segretto.
E boñe do quaterno e terno se peuan formâ solo che co-i sbiri, i cavalli, e dònne e i òmmi. Un zugou o peu dispoñe s’o veu, pe raxoin strategiche, de accusâ solo che un terno sciben ch’o l’à tutte quattro e carte pe formâ o quaterno, de mainea che unna carta a l’arreste segretta.
Boñe cattuæ
In azzonta a-e boñe de man, unna variante facoltativa de regole a l’é de dâ di ponti ascì pe-e boñe cattuæ.[7]
Segondo sta variante, se a-a fin da man unna squaddra a l’à into seu muggetto de preise e carte che correspondan à çertiduñe boñe, a peu guägnâ di ponti in azzonta. E boñe a quæ cattua a dà di ponti en: i gatti, e famigge, i quaterni e i terni. A cattua de frilli e taròcchi a no dà di ponti. I ponti pe-a cattua de ste boñe en i mæximi de quelli pe-e boñe de man, scriti inta töa de d’ato.
Ponti
I ponti complescivi en fæti da-a somma di ponti de masso (78 inte tutto tra e doe squaddre), un numero variabile de ponti pe-e boñe (segge de man, segge cattuæ) e, se l’é stæto guägno, i 20 ponti do bagatto urtimo.
I ponti se scrivan in sce un papê, inte unna töa con doe colònne, uña pe squaddra. Pe ciascheduña man, inta primma riga e squaddre scrivan inta seu colònna a somma di ponti de seu boñe de man. Inta riga dòppo scrivan a somma di ponti de boñe cattuæ (se deuvian sta variante) e di ponti pe-o bagatto urtimo (se l’é stæto guägno). Inte unna tersa riga scrivan a somma di seu ponti de masso, e de sotta tian unna riga pe marcâ a fin da man. Dapeu van avanti à scrive i ponti de moen apreuvo da mæxima mainea. A-a fin da partia, ciascheduña squaddra a somma i ponti da seu colònna pe ottegnî i seu ponti complescivi.
In sciô feuggio di ponti, da arente a-i ponti de boñe, o peu ëse utile scrive ascì o nomme da respettiva boña. L’exempio chì dabasso o l’é de doe moen tra a squaddra A e a squaddra B. Inta primma man, a squaddra A a l’à avuo inte moen 16 frilli, e a squaddra B a no l’à avuo nisciuña boña de man; a squaddra A a l’à cattuou tutte e figue de dinæ (famiggia de dinæ, pe 10 ponti), e a squaddra B a l’à cattuou i gatti (10 ponti); tutte doe e squaddre an guägno 39 ponti de masso. Inta segonda man, a squaddra A a l’à accusou un terno de cavalli, pe 5 ponti, e a squaddra B a l’à accusou gatti, pe 10 ponti; a squaddra B a l’à cattuou a famiggia de coppe, pe 10 ponti, e a l’à guägno o bagatto urtimo, pe 20 ponti; a squaddra A a l’à guägno 20 ponti de masso, a B a n’à guägno 58.
Squaddra A | Squaddra B |
---|---|
16 F | |
10 ♦ | 10 G |
39 | 39 |
5 C | 10 G |
30 ♥B | |
20 | 58 |
Inte l’exempio de d’ato, i ponti finali pe-a squaddra A en donca 16+10+39+5+20=90, e pe-a squaddra B en 10+39+10+30+58=147.
Variante
Gatti inta trei
A variante pe trei zugoei a l’é squæxi do tutto pægia a-a verscion inta quattro. Descrivemmo e differense chì de sotta.
Partia No gh’é de squaddre: i trei zugoei zeugan da pe lê. Unna partia a l’é fæta de træ moen.
Distribuçion e scarto O massê o dà 25 carte pe zugou, à çinque pe vòtta. À l’urtimo gio de distribuçion, o massê o se piggia e træ carte che avansan. O seu scarto o saià de træ carte.
Boñe Tutte e boñe en pæge, con l’ecceçion de frilli pe-a quæ into zeugo inta trei gh’é beseugno d’aveine a-o manco 20. Sta boña a vâ delongo 1 ponto pe frillo.
Gatti inta doî
Se peu zugâ inta doî ascì, into quæ caxo e regole en e mæxime che pe-a verscion inta quattro, ma i doî zugoei en assettæ vexin e ciaschedun o contròlla un compagno virtuale dito mòrto, fæto da unna man de carte misse de fronte à lê.
Stæto fæto o scarto, e moen di mòrti en descoverte e e carte en ammersæ.